彝文版|中国共产党第二十届中央委员会第三次全体会议公报
- 作者:
- 编辑:
- 来源:新华社
- 发布时间:2024-07-18 22:25:51
- 作者:
- 编辑:
- 来源:新华社
- 发布时间:2024-07-18 22:25:51
ꍏꇩꇭꍣꄈꑍꊏꈭꌠꍏꑷꊈꑼꉼ
ꌕꃢꌠꐊꈴꃀꈿꌠꉻꄜ
(2024ꈎ7ꆪ18ꑍꍏꇩꇭꍣꄈꑍꊏꈭꌠꍏꑷꊈꑼꉼꌕꃢꌠꐊꈴꃀꈿꅉꇬꉌꃹꈴꄉꌠ)
ꍏꇩꇭꍣꄈꑍꊏꈭꌠꍏꑷꊈꑼꉼꌕꃢꌠꐊꈴꃀꈿꌠꆹ,2024ꈎ7ꆪ15ꑍꅑ18ꑍꀙꏢꄉꈿ。
ꋌꃢꐊꈴꃀꈿꈽꇁꌠꆹ,ꍏꑷꊈꑼ199ꑻ,ꊁꇱꍏꑷꊈꑼ165ꑻꐥ。ꍏꑷꍬꏦꍤꄻꊈꑼꉼꎮꃷꊈꑼꉼꊈꑼꌋꆀꄚꃆꂮꐥꁁꏯꆽꎍꐋꀨꈧꌠꃀꈿꈽꇁꀐ。ꄈꅿꃀꀉꒉꑍꊏꃢꌠꁧꎁꈐꅉꂫꊐꌠꇬꐋꀨꌋꆀꌧꃀꌧꌺꈨꑌꃀꈿꈽꇁꀐ。
ꐊꈴꃀꆹꍏꑷꍔꍞꏳꁳꊥꇺꎻ。ꍏꑷꊈꑼꉼꊝꎻꏹꑮꏣꀻꆹꅇꀋꂿꑘꌠꉉꀐ。
ꐊꈴꃀꆹꑮꏣꀻꍏꑷꍔꍞꏳꎁꃅꌤꃅꅇꄜꌠꅱꄻꌋꆀꇕꄟꀐ,《ꍏꇭꍏꑷꀒꁨꋍꁘꃅꐊꑷꃅꃹꅼꃅꄺꀱ、ꍏꇩꃤꐛꏀꈴꌠꄹꎆꌠꃆꂮꏤꐪ》ꌌꍤꇖꉌꃹꈴꄉꀐ。ꑮꏣꀻꆹ《ꏤꐪ(ꇕꄟꄯꒉ)》ꌌꐊꈴꃀꈿꌠꏭꉉꀽꀐ。
ꐊꈴꃀꆹꋒꐯꋒꃅꄈꅿꑍꊏꈭꑍꃢꐊꈴꃀꈿꊂꅑꅸꇁꌠꍏꑷꍔꍞꏳꌤꃅꌠꏚꍆꀐ。ꐯꇯꉜꇬ,ꊋꋠꌼꇪꌠꇩꏹꋦꈭꌋꆀꊋꋠꀉꇖꌠꇩꈐꄺꀱꀻꎆꎍꐽꂿꃆꏭꊝꇬ,ꍏꑷꍔꍞꏳꆹꎔꎗꃅꄈꅿꃀꀉꒉꑍꊏꃢꌠꌋꆀꑍꊏꈭꋍꃢ、ꑍꃢꐊꈴꃀꈿꌠꉌꊈꃄꌬꇫꑟ,ꐛꒆꊒꌸꃅꐊꑷꃅꀻꎆꉪꉻꀊꏀꌠꃄꌬꈴ,ꎍꐽꌠꇬꄉꀒꁨꆹꌠꎹꌠꌤꃅꀑꐱꅉꃀꉉꈌꌭꈬ,ꏓꇲꄉ“ꉬꑵꋍꉻ”ꉻꄜꄐꉻꄹꎆ、ꋮꄮꃅ“ꇖꑵꐊꑷ”ꄐꇐꄐꉻꄹꎆ,ꇩꈐꇩꏹꃅꇴꄉꉻꀉꒉꑍꂷꌠꏓꇲ,ꀻꎆꌋꆀꋬꂻꌠꏓꇲ,ꊋꇤꄉꊇꁧꀊꂥꃅꀻꎆꌠꄹꇙ,ꀒꁨꋍꁘꃅꐊꑷꃅꃹꅼꃅꄺꀱꌠꄹꇙꌋꆀꁈꏂ,ꏟꈯꃅꐧꋦꉪꏦꋯꁦꏦꏲꋈꄻꌠꄹꎆ,ꀋꆏꃅꊋꀥꇱꄉꉪꇐꁱꀕꌤꃅꌠꄜꉺ,ꃶꐚꃅꉹꁌꐥꐨꏦꀧꌠꌋꆀꒆꉻꋦꈭꀧꌋꃅꌠꒃꉇꋒ,ꏟꈯꃅꇩꏤꋬꂻꌋꆀꐧꋦꎍꐽꌠꀧꌋꃅ,ꊋꑌꃅꇩꐏꌋꆀꂽꋈꄻꌠꄹꎆ,ꐪꊛꄉꇤꀎꌤꃅꌠꌋꆀꄠꃪꌤꃅꌠꄹꎆ,ꃹꅼꃅꍏꇩꐛꐨꇩꏤꀉꒉꉈꉻꏭꑌꑲꌠꄹꎆ,ꐊꑷꃅꏦꇨꃅꄈꏱꄻꌠꄹꎆꌠꃅꇬꎷ,ꎆꏣꀱꉾꃪꇁꌠꃅꇫꑟ,ꐊꑷꃅꐧꋦꉪꏦꐛꏀꈴꇩꏤꋈꄻꌠꑭꁘꏟꈯꌠꐕꎼꆹ。
ꐊꈴꃀꆹꀊꂥꃅꃅꋊꀊꏀꋎꌠꅑꅸꇁꊂꐊꑷꃅꃹꅼꃅꄺꀱꌠꊋꐛꃄꄻꐨꌋꆀꇰꀋꃀꌠꊌꐨꉉꍣ,ꀒꁨꋍꁘꃅꐊꑷꃅꃹꅼꃅꄺꀱ、ꍏꇩꃤꐛꏀꈴꌠꌤꃆꄹꎆꌠꎥꃪꀐ,ꉜꇬꀋꃅꋋꇅꇬꌋꆀꋌꊂꋍꊭꇬꆹꍏꇩꃤꐛꏀꈴꌠꌌꐊꑷꃅꇩꏤꀉꇨꌠꋈꄻ、ꊿꋅꀱꌄꆣꇁꌠꃅꑘꇰꀋꃀꌠꄹꎆꀋꉬꀋꉆꊬꌠꉬ。ꍏꇩꃤꐛꏀꈴꌠꆹꄺꀱꁉꃑꌠꇬꄉꀋꆏꃅꄹꎆꌠꉬ,ꉈꑴꋌꊂꄺꀱꁉꃑꌠꇬꄉꊫꂫꁤꇅꀕꌠꀹꄻꌠꑌꉬ。ꌼꇪꊋꋠꌠꇩꏹꇩꈐꃅꒊꃅꇁꏭꊝꇬ,ꀊꏀꈭꌠꈆꑪꇮꇐꇝꂱꌠꌋꆀꅐꑘꆴꄻꌠꏭꊝꇬ,ꏓꂱꉹꁌꉘꇉꐨꀊꏀꌠꏭꊝꇬ,ꀋꎪꃅꑴꐚꃅꄺꀱꌠꌌꀊꅰꃅꀋꉬꀋꉆꅉꇬꐕꄉ,ꏟꈯꀕꃅꍏꇩꃤꐛꏀꈴꌠꄹꎆꌠꇬꆼꒆꄉꀒꁨꋍꁘꃅꐊꑷꃅꃹꅼꃅꄺꀱꌶ。
ꐊꈴꃀꊡꀱꇬ,ꀒꁨꋍꁘꃅꐊꑷꃅꃹꅼꃅꄺꀱꇬꆹ,ꀋꎪꃅꂷꇻꌦꆺꆀꉪꏦ、꒜꒾ꄏꉪꇐ、ꄓꑦꀻꌧꇗ、“ꌕꑵꁧꎁ”ꉪꇐꀋꂿꑘꌠ、ꈆꑪꃅꀻꎆꌠꉜꐨꌭꈬ,ꐊꑷꃅꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꃄꌬꈴ,ꃹꅼꃅꑮꏣꀻꊝꎻꏹꐊꑷꃅꃹꅼꃅꄺꀱꌠꃆꂮꉪꇐꀊꏀꌠ、ꉜꐨꀊꏀꌠ、ꉉꇐꀊꏀꌠꋍꋬꈭꌶꄻꃄꌬꈴ,ꐛꒆꃅꊒꌸꃅꐊꑷꃅꀻꎆꉪꉻꀊꏀꌠꃄꌬꈴ,ꎍꐽꅉꄉꀒꁨꆹꌠꌤꃅꀑꐱꅉꃀꉉꈌꌭꈬ,ꉪꇐꁌꄝ、ꑞꉬꌠꑞꃅꄉ、ꃅꋊꐊꄉꀒꁨꆹ、ꇯꍝꌠꎹꃶꐚꌠꃅꌠꌭꈬ,ꀒꁨꋍꁘꃅꐧꋦꒃꅐꊋꃤꁌꄝꌋꆀꀻꎆ、ꐧꋦꍄꑐꊋꃤꄖꄑꌋꆀꀉꇨꇁꎻ,ꇩꈐꇩꏹꃅꇴꄉꉻꀉꒉꑍꂷꌠꏓꇲ,ꏓꇲꄉ“ꉬꑵꋍꉻ”ꉻꄜꄐꉻꄹꎆ,ꋮꄮꃅ“ꇖꑵꐊꑷ”ꄐꇐꄐꉻꄹꎆ,ꎆꏣꏦꉻꄺꀱꌠꌌꈻꏁꅍꃅꄉ,ꐧꋦꀋꈐꀋꉈꑗꉬꌠꊥꎆ、ꏓꂱꐥꌒꐨꁦꎆꇁꌠꌌꄓꈌꌋꆀꑞꅉꃅꄉ,ꀊꅰꃅꉻꑫꏓꐛꌠꉜꁨ,ꀊꅰꃅꀋꉬꀋꉆꌠꄻꀨꇬꄉꌠꉜꁨ,ꀊꅰꃅꄺꀱꌠꃶꐚꇿꋌꉜꁨ,ꒃꅐꐮꃆꂮꌋꆀꒃꅐꊋꃤ、ꄩꇴꏦꉻꌋꆀꎆꏣꅉ꒜、ꇩꏤꏱꄻꌋꆀꐧꋦꀻꎆꌠꀊꅰꉾꃪꃅꐮꄉꄐꌠꄹꇙꄉ,ꍏꇩꃤꐛꏀꈴꌠꎁꃅꇙꊋꀉꇨꌠꌋꆀꄹꏦꏦꀧꌠꇲꁵ。
ꐊꈴꃀꄐꌐꎼꇁꇬ,ꀒꁨꋍꁘꃅꐊꑷꃅꃹꅼꃅꄺꀱꌠꏓꇱꁻꌐꆹꐪꊛꄉꍏꇩꐛꐨꐧꋦꉪꏦꄹꏦꄻꐛꒆꌋꆀꀻꎆ,ꇩꏤꏱꄻꉻꑫꌋꆀꏱꄻꄐꊋꐛꏀꈴꌠꄹꎆꌠꉬ。ꑍꄙꆀꌕꊯꉬꈎꑟꇬꆏ,ꐊꑷꃅꑞꅉꀊꂥꌠꐧꋦꉪꏦꃷꎏꎆꏣꏦꉻꄻꐛ,ꍏꇩꐛꐨꐧꋦꉪꏦꄹꏦꀊꅰꃅꐛꒆ,ꀑꐱꃅꇩꏤꏱꄻꉻꑫꌋꆀꏱꄻꄐꊋꐛꏀꈴꌠꃅꇫꑟ,ꀑꐱꃅꐧꋦꉪꏦꐛꏀꈴꌠꃅꇫꑟ,ꃅꋊꋋꋏꐧꀠꊬꌠꇬꑟꇬꐊꑷꃅꐧꋦꉪꏦꐛꏀꈴꌠꇩꏤꀉꇨꌠꋉꐛꌠꎁꃅꅉꃀꈫꈈꌠꌆꄻ。ꑞꅉꀊꂥꌠꐧꋦꉪꏦꃷꎏꎆꏣꏦꉻꋈꄻꌠꇬꏓꌵ,ꈁꉬꈴꎁꇬꃅꏓꂱꋯꁦꀻꎆꌠꇬꏓꌵ,ꐧꋦꉪꏦꁱꀕꀉꇨꌠꇩꏤꋈꄻꌠꇬꏓꌵ,ꏓꂱꐥꐨꊇꁧꉀꐕꌠꇬꏓꌵ,ꎔꃨꌠꍏꇩꋈꄻꌠꇬꏓꌵ,ꑞꅉꀊꅰꀊꂥꌠꋬꂻꍏꇩꋈꄻꌠꇬꏓꌵ,ꄈꅿꏲꂠꄐꐨꌋꆀꀊꉗꃅꌅꈌꌬꌠꊋꃤꉀꐕꌠꇬꏓꌵꄉ,ꐪꊛꄉꄺꀱꌠꄹꆷꅷꀒꁨꆹꌶ。ꅑꅸꑍꄙꆀꑍꊎꈬꈎꍏꉸꏓꂱꇭꉼꇩꄻꉆꊰꈎꈭꏝꐛꄮꑟꇬꆏ,ꏤꐪꋌꋐꇬꄜꎼꇁꌠꄺꀱꂿꃆꃅꌐ。
ꐊꈴꃀꊡꀱꇬ,ꀒꁨꋍꁘꃅꐊꑷꃅꃹꅼꃅꄺꀱꇬꆹꄺꀱꁉꃑꊂꅑꅸꇁꌠꈜꀕꇈꃅꋊꀊꏀꋎꌠꐊꑷꃅꃹꅼꃅꄺꀱꌠꎖꋪꁌꇐꈤꌠꏓꈹꌋꆀꌫꄻ,ꄈꐊꑷꃅꏲꂠꌠꌭꈬ、ꏓꂱꌌꈯꄜꃅꄉꌠꌭꈬ、ꎃꍬꏀꀺꌠꌭꈬ、ꄹꏦꋈꄻꌠꌌꀨꑟꃅꄉꌠꌭꈬ、ꐊꑷꃅꏦꈴꇩꏲꌠꌭꈬ、ꉻꑫꉪꉻꌭꈬꑠꏥꏦꃄꌬꈴ。
ꐊꈴꃀꆹꀒꁨꋍꁘꃅꐊꑷꃅꃹꅼꃅꄺꀱꌠꌌꉻꑫꃅꄐꁆꎼꇁꀐ,ꊡꀱꇬꑞꅉꀊꂥꌠꐧꋦꉪꏦꃷꎏꎆꏣꏦꉻꏓꄻ,ꎆꏣꊇꁧꀊꂥꃅꀻꎆꌠꄹꇙꌠꏦꉻꉺꏦꄻꐛꒆ,ꐊꑷꃅꏀꀺꊋꁈꄏꌠꏦꉻꉺꏦꏓꄻ,ꉻꒉꎆꏣꏱꄻꉻꑫꄻꐛꒆ,ꇓꈓꇓꉈꐮꉔꄉꀻꎆꌠꏦꉻꉺꏦꄻꐛꒆ,ꑞꅉꀊꂥꃅꉇꉻꏭꁉꃑꌠꏦꉻꉺꏦꄻꐛꒆ,ꈁꉬꈴꎁꇬꃅꏓꂱꋯꁦꄹꏦꉻꑫꄻꐛꒆ,ꍏꇩꐛꐨꐧꋦꉪꏦꏦꏲꉻꑫꄻꐛꒆ,ꃹꅼꃅꁱꀕꄹꏦꏦꉻꄺꀱ,ꉹꁌꐥꐨꏦꀧꌋꆀꄻꃪꌠꄹꏦꉻꑫꄻꐛꒆ,ꃹꅼꃅꒆꉻꌧꑳꏦꉻꄺꀱ,ꇩꏤꋬꂻꉻꑫꌋꆀꄐꊋꐛꏀꈴꌠꄹꎆ,ꐪꊛꄉꃹꅼꃅꇩꐏꌋꆀꂽꄺꀱ,ꄈꀒꁨꋍꁘꃅꐊꑷꃅꃹꅼꃅꄺꀱ、ꍏꇩꃤꐛꏀꈴꌠꄹꎆꌠꏭꏲꂠꑟꐨꉀꐕ。
ꐊꈴꃀꄜꎼꇁꇬ,ꑞꅉꀊꂥꌠꐧꋦꉪꏦꃷꎏꎆꏣꏦꉻꆹꍏꇩꃤꐛꏀꈴꌠꏦꀧꅍꀋꂿꑘꌠꉬ。ꀋꎪꃅꀊꅰꉾꃪꃅꃷꎏꉺꏦꂿꄐꋊꇤ,ꃷꎏꋦꈭꀊꅰꃅꀋꈐꀋꉈ、ꀊꅰꃅꍄꑐꊋꃤꐥꌠꀹꄻꄉ,ꅐꀦꁆꇱꑘꅐꐨꉾꐯꉾꌠꌋꆀꊌꐨꀉꒉꐯꀉꒉꌠꃅꇫꑟ,“ꃑꍄꑐꄎ”ꇈ“ꏲꄉꄎ”,ꀊꅰꉾꃪꃅꃷꎏꐥꀹꀧꌋꃅ、ꃷꎏꂿꄐꀋꐥꌠꇬꅋꑣ,ꇩꂱꎆꏣꄻꀰꏮꌠꁣꀋꐥꃅꄉ,ꐧꋦꑭꊂꈏꒆꇙꊋꌋꆀꏀꀺꍄꑐꊋꃤꄖꄑꌶ。ꀋꇙꀋꑐꃅꉻꁨꏦꎆꏣꄻꈫꈈꌋꆀꀻꎆ,ꀋꇙꀋꑐꃅꉻꁨꏦꀋꉬꌠꎆꏣꀻꎆꌠꊋꊡ、ꊋꁈꄏ、ꄐꏁ,ꋍꑞꋍꑵꁨꏦꎆꏣꏦꃤꇬꈴꄉꐽꊯꃅꒃꅐꐊꊈꌫꄻ、ꀋꈐꀋꉈꃅꃷꎏꋓꅔꈽ、ꐯꌟꃅꏦꃤꁳꀧꌋꃅꎻꌠꄉꀧ,ꋍꑞꋍꑵꁨꏦꎆꏣꂱꎆꅑꐨꐯꅋꐮꑣ、ꐯꇯꀻꎆꌠꊥꎆ。ꇩꏤꑭꊂꋍꃱꃅꌠꃷꎏꀉꒉꌠꏓꄻ,ꃷꎏꎆꏣꅉꃀꄹꏦꄻꐛꒆ。
ꐊꈴꃀꄜꎼꇁꇬ,ꊇꁧꀊꂥꃅꀻꎆꌠꆹꐊꑷꃅꐧꋦꉪꏦꐛꏀꈴꇩꏤꋈꄻꌠꂿꃆꀨꐘꌠꉬ。ꀋꎪꃅꀻꎆꉪꉻꀊꏀꌠꌌꄺꀱꌠꄐꏁ,ꀻꎆꀊꏀꊬꌠꇬꉆꄉ,ꃹꅼꃅꇲꁵꁁꏯꐛꉻꃅꐙꌠꄺꀱ,ꊇꁧꀊꂥꃅꀻꎆꌠꄹꇙꌠꊋꊡꏢꑲꉺꏦꄻꐛꒆ,ꀻꎆꌠꇙꊋꀊꏀꌠꂱꎆꅑꐨꀊꏀꌠꎵꄻꌶ。ꑞꃅꋭꌠꑞꃅꃅꊈꏀꒃꅐꊋꃤꏦꉻꉺꏦꄻꐛꒆ,ꐥꄜꎆꏣꌋꆀꃷꂷꎆꏣꃹꅼꃅꐮꉔꌠꊥꎆꌠꄹꏦꄻꐛꒆ,ꁧꃤꃅꑘꀻꎆꏦꉻꉺꏦꄻꐛꒆ,ꐛꏀꈴꅉꃀꉁꈾꋈꄻꏦꉻꉺꏦꄻꐛꒆ,ꅐꑘꊛꏣꇲꁵꊛꏣꍕꎇꐨꌋꆀꋬꂻꑟꐨꉀꐕꄹꏦꄻꐛꒆ。
ꐊꈴꃀꄜꎼꇁꇬ,ꂘꑘ、ꈆꑪꇮꇐ、ꌧꊿꆹꍏꇩꃤꐛꏀꈴꌠꅉꃀꃅꐙꌠ、ꄐꇐꏤꁈꃅꐙꌠꄘꄏꅍꉬ。ꀋꎪꃅꃹꅼꃅꈆꑪꂘꑘꌌꇩꏤꄖꄑꌄꆣꌠꄐꇐꏤꁈ、ꌧꊿꌌꇩꏤꋈꄻꀉꇨꎻꌠꄐꇐꏤꁈ、ꏀꀺꌠꌌꀻꎆꌠꅸꇙꌠꄐꇐꏤꁈꃄꌬ,ꏓꇲꄉꂘꑘꈆꑪꇮꇐꌧꊿꏦꉻꉺꏦꏓꋍꃱꃅꄺꀱꌠꄹꎆ,ꀊꏀꉹꌠꇩꏤꑭꊂꏦꉻꄻꐛꒆ,ꇩꏤꏀꀺꉻꑫꉻꄜꂿꄐꉀꐕ。ꃹꅼꃅꂘꑘꏓꇱꄺꀱ,ꃹꅼꃅꈆꑪꇮꇐꏦꉻꄺꀱ,ꃹꅼꃅꌧꊿꀻꎆꏦꉻꉺꏦꄺꀱ。
ꐊꈴꃀꄜꎼꇁꇬ,ꈆꑪꃅꐙꌠꉻꒉꋊꐽ、ꇿꋌꐥꌠꍔꃚꏱꄻꌠꆹꐧꋦꉪꏦꃷꎏꎆꏣꏦꉻꂱꎆꅑꌠꋊꇤꅐꇁꌠꈏꇓꇖꐨꉬ。ꀋꎪꃅꉻꒉꋊꐽꄹꏦꉻꑫꄻꐛꒆ,ꏓꇲꄉꏱꎆꇗꏸ、ꎆꒉꎆꇁꑠꀋꉬꀋꉆꁁꏯꄺꀱꌠꄹꎆ,ꉻꒉꏱꁈꌬꐨꋍꃱꃅꐙꌠꄻꀉꇨ。ꇩꏤꄐꇐꏤꁈꄐꎖꉻꑫꌋꆀꏱꁈꏓꇲꋮꄮꉺꏦꄻꐛꒆ,ꃹꅼꃅꏱꎆꇗꏸꏦꉻꄺꀱ,ꃹꅼꃅꎆꒉꎆꇁꏦꉻꄺꀱ,ꃄꁕꋮꄮꃅꀻꎆꃄꌬꌠꄐꇐꏤꁈꉺꏦꄻꐛꒆ。
ꐊꈴꃀꄜꎼꇁꇬ,ꇓꈓꇓꉈꐮꉔꀻꎆꌠꆹꍏꇩꃤꐛꏀꈴꌠꇖꐨꉫꎂꀕ。ꀋꎪꃅꀊꏀꉹꌠꇮꑘꈴꌠ、ꀊꏀꉹꌠꇓꈓꏦꎫꐛꈴꌠꌋꆀꑣꋂꐊꑷꃅꄖꄑꌄꆣꌠꏓꇲ,ꐊꑷꃅꇓꈓꇓꉈꄐꎖ、ꋈꄻ、ꏱꄻꌠꐮꉔꑟꐨꉀꐕ,ꇓꈓꇓꉈꐊꊈꐽꊯꃅꐮꀠ、ꐮꏯꉜꄉꏭꇙꌠꊥꎆ,ꇓꈓꇓꉈꐮꍣꐨꊨꒊ,ꇓꈓꇓꉈꐯꇯꌄꆣꀻꎆꌠꊥꎆ。ꀊꏀꉹꌠꇓꈓꏦꎫꐛꈴꌠꄹꎆꏦꉻꉺꏦꄻꐛꒆ,ꂿꑘꁡꇤꅉꀨꀰꏢꄹꏦꄻꈫꈈꌋꆀꄻꐛꒆ,ꂿꑘꀉꇨꂿꑘꈲꊌꂿꑘꌣꈚꌠꊋꁈꄏꄹꏦꄻꐛꒆ,ꃹꅼꃅꃄꅉꄹꏦꄺꀱ。
ꐊꈴꃀꄜꎼꇁꇬ,ꁉꃑꌠꆹꍏꇩꃤꐛꏀꈴꌠꊨꄅꌠꌐꂷꉬ。ꀋꎪꃅꉇꉻꏭꁉꃑꌠꅉꀨꇩꁈꌭꈬ,ꁉꃑꌠꌌꄺꀱꌠꊥꎆꌠꌭꈬ,ꉪꇩꏤꄉꈁꀉꒉꐯꀉꒉꌠꃷꎏꂱꎆꅑꐨꇬꊫꁱꄉ,ꇩꏹꇷꃅꌠꍔꐯꅉꇬꄉꁉꃑꊋꃤꉀꐕ,ꑞꅉꀊꅰꀊꂥꌠꁉꃑꉹꌠꎆꏣꏦꉻꀊꏀꌠꋈꄻ。ꎍꐽꃅꄹꏦꉹꌠꁉꃑꌠꍔꒉ,ꃹꅼꃅꉇꉻꃼꇇꏦꉻꄺꀱ,ꃹꅼꃅꉇꉻꃼꇇꎆꇱꌠꌋꆀꉇꉻꎆꇱꏲꂠꏦꉻꄺꀱ,ꃄꁕꁉꃑꄐꉻꄻꃪ,ꊇꁧꀊꂥꃅꐯꇯ“ꋍꁕꋍꈜ”ꋈꄻꌠꄹꎆꉺꏦꄻꐛꒆ。
ꐊꈴꃀꄜꎼꇁꇬ,ꈁꉬꈴꎁꇬꃅꏓꂱꋯꁦꀻꎆꌠꆹꍏꇩꃤꐛꏀꈴꌠꊇꅉꇖꐨꉬ。ꀋꎪꃅꀋꇙꀋꑐꃅꍏꇩꐛꐨꐧꋦꉪꏦꍔꍞꀻꎆꈝꃀꍬ,ꉪꇩꏤꁧꀦꍔꍞꄹꏦ、ꅉꀨꍔꍞꄹꏦ、ꍔꍞꄹꏦꀋꂿ꒧ꌠꌭꈬꌋꆀꄻꐛꒆ,ꋍꑞꋍꊐꌠꋯꁦꇶꏦꄻꀉꑌ,ꏓꂱꑱꏲꃥꌋꄻꌠꑭꋧꐨ、ꃶꐚꐨꄛꑣꅷꇩꏤꍔꍞꐥꐨꌋꆀꐧꋦꐥꐨꋍꑞꋍꁆꏯꇬꑟꌶ。ꊋꀥꇱꄉꏓꂱꑱꏲꃥꌋꄻꌠꄹꏦꋈꄻ,ꋮꒉꋯꁦꉺꏦꄻꐛꒆ,ꅉꂫꊐꌠꋯꁦꄹꏦꄻꐛꒆ,ꀉꒉꃅꏓꋍꃱꃅꁁꏯꌤꃅꐛꊂꄻꐛꒆ。
ꐊꈴꃀꄜꎼꇁꇬ,ꏦꏲꌠꆹꍏꇩꃤꐛꏀꈴꌠꇬꏦꀧꅍꀋꂿꑘꌠꉬ。ꀋꎪꃅꐊꑷꃅꏦꃀꃄꌬꑞꅉꑟ,ꏦꃀꋦꒉꐨꀧꌋꃅ,ꐮꐊꄉꏦꃤꏤꄻ、ꏦꌬ、ꌦꃔ、ꏦꍬꌠꋍꑞꋍꑵꈭꊭꄺꀱꌠꄹꎆ,ꏦꃤꂴꆽꊿꃅꐥꊯꌐꑠꏦꀧꉺꏦꄻꐛꒆ,ꐧꋦꉪꏦꏦꏲꉌꊈꍔꆙ,ꐧꋦꀋꈐꀋꉈꑗꉬꌠꀧꌋꃅ,ꐊꑷꃅꇩꏤꋍꑞꋍꁁꏯꌤꃅꏦꏲꈴꌠꄹꎆ。ꃹꅼꃅꏦꃤꏤꄻꁁꏯꄺꀱ,ꃹꅼꃅꏦꃤꇬꈴꄉꏲꑘꏲꌠꄹꎆ,ꀋꈐꀋꉈꃅꏦꌬꌦꃔꏦꉻꉺꏦꄻꐛꒆ,ꏦꏲꐧꋦꋈꄻꌠꄹꎆꉺꏦꄻꐛꒆ,ꊋꀥꇱꄉꉇꉻꃆꂮꐥꌠꏦꏲꋈꄻ。
ꐊꈴꃀꄜꎼꇁꇬ,ꍏꇩꃤꐛꏀꈴꌠꆹꐥꇐꌧꑳꌋꆀꉌꊈꌧꑳꐮꄮꌠꐛꏀꈴꌠꉬ。ꀋꎪꃅꁱꀕꑴꑇꌠꀉꇨꇁꎻ,ꐧꋦꉪꏦꂴꅑꁱꀕꀻꎆ,ꇝꂱꁱꀕꍔꆙ,ꍏꉸꋊꃅꁱꀕꉾꃪꌠꊪꊛ,ꐳꃅꈴꌗꇮꇐꐳꐯꐳꃅꀻꎆꌠꃅꒊꃅꇁꀊꏀꌠꇬꄉꄐ,ꁱꀕꄞꅐꌠꌧꊿꄉꈁꀉꒉꌠꉘꉚꐛꄉ,ꊿꋅꑭꊂꁱꀕꏀꀺꀹꄻꌠꍄꑐꊋꃤꄖꄑꎼꇁ。ꉪꐪꐛꉻꌤꃅꆼꎍꄹꏦꄻꐛꒆ,ꁱꀕꁧꃤꃅꌠꌋꆀꁱꀕꅐꇐꇲꁵꉺꏦꄻꉾꃪ,ꈄꏍꏓꇱꏱꄻꉻꑫꄻꐛꒆ,ꀊꅰꃅꇿꋌꐥꌠꇩꏹꄜꁊꉻꑫꏓꄻ。
ꐊꈴꃀꄜꎼꇁꇬ,ꀻꎆꌠꇬꄉꉹꁌꐥꐨꏦꀧꌋꆀꄻꃪꌠꆹꍏꇩꃤꐛꏀꈴꌠꂿꃆꀉꒉꀊꂾꌠꉬ。ꀋꎪꃅꊋꈀꑌꃅꇤꄉꃅ、ꊋꎖꄉꃤꀳꌠꌭꈬꌶ,ꅉꀨꄉꉻꁧꃤꃅꌠꄹꏦꉻꑫꄻꐛꒆ,ꊋꀥꇱꄉꁊꈲꃅꐙꌠ、ꅉꃀꃅꐙꌠ、ꉱꑟꃅꐙꌠꉹꁌꐥꐨꋈꄻ,ꏓꂱꇫꉈꇬꐯꉈꇬꈛꎂꐯꈛꎂꃶꐚꐯꃶꐚꌠꈲꁧꌤꃆꂥꀘꋒ,ꀋꆏꃅꏓꂱꐥꐨꐥꌒꉌꑌꌠꇬꇎꈴꎻ。ꊌꐨꁷꄻꄹꏦꄻꐛꒆ,ꃅꑘꊌꌠꄻꂴꄉꌠꏱꁈꄻꐛꒆ,ꐧꋦꏦꀧꉻꑫꄻꐛꒆ,ꃹꅼꃅꆅꉁꁬꋌꁦꎴꆄꄻꏦꉻꄺꀱ,ꊻꂷꀻꎆꊋꁈꄏꌠꌋꆀꁧꃤꃅꉻꑫꄻꐛꒆ。
ꐊꈴꃀꄜꎼꇁꇬ,ꍏꇩꃤꐛꏀꈴꌠꆹꊿꌋꆀꋌꐛꐮꄮꃅꐯꈽꐥꌠꐛꏀꈴꌠꉬ。ꀋꎪꃅꒆꉻꌧꑳꄹꏦꉻꑫꄻꐛꒆ,ꐮꐊꄉꌋꊨ、ꍍꊨ、ꀊꃴꌠꍔꒉ、ꉀꎆꌠꄹꎆ,ꏣꀋꑌꃅꃄꀑꃅꌗꐛꐈꌠꏭꊜꄻ,ꐳꃅꒉꆧꁧꃴꌠꆹꐎꁧꏂꁧꉬꌠꉪꉻꃅꇫꑟꌠꏦꉻꉺꏦꄻꐛꒆ。ꒆꉻꌧꑳꅉꃀꏦꉻꄻꐛꒆ,ꒆꉻꋦꈭꏱꄻꉻꑫꄻꐛꒆ,ꀊꃴꌋꀁꂥꌠꀻꎆꉺꏦꄻꐛꒆ。
ꐊꈴꃀꄜꎼꇁꇬ,ꇩꏤꋬꂻꌠꆹꍏꇩꃤꐛꏀꈴꌠꄔꐽꎴꏷꌠꅉ꒜ꀋꂿꑘꌠꉬ。ꀋꎪꃅꐊꑷꃅꉻꄜꇩꏤꋬꂻꉜꐨꃄꌬꈴ,ꇩꏤꋬꂻꀧꌋꃅꌠꏦꉻꉺꏦꄻꐛꒆ,ꊇꁧꀊꂥꃅꀻꎆꌠꌋꆀꑞꅉꀊꂥꌠꋬꂻꉾꃪꃅꐮꇙꌠꃅꇫꑟ,ꃶꐚꃅꇩꏤꎴꏲꑘꒃꌠꏦꀧ。ꇩꏤꋬꂻꉻꑫꄻꐛꒆ,ꄉꉻꋬꂻꏱꄻꉺꏦꄻꐛꒆ,ꐧꋦꏱꄻꉻꑫꄻꐛꒆ,ꉇꉻꃆꂮꐥꌠꇩꏤꋬꂻꉺꏦꄻꐛꒆ。
ꐊꈴꃀꄜꎼꇁꇬ,ꇩꐏꌋꆀꂽꐛꏀꈴꌠꆹꍏꇩꃤꐛꏀꈴꌠꇬꀋꉬꀋꉆꌠꄹꁆꉬ。ꀋꎪꃅꄈꆹꏓꂱꂽꏭꀋꎪꃅꏲꂠꌠꌭꈬ,ꃹꅼꃅꄺꀱꄉꂽꇨꌠꄐꇐꏤꁈꃄꌬ,ꏤꈉꈐꃅꂽꋈꄻꋍꉐꈎꉈꈽꌠꑞꅉꁻꌐꃅꇫꑟ、ꀑꐱꃅꇩꐏꌋꆀꂽꐛꏀꈴꌠꃅꇫꑟꌠꎁꃅꊋꑌꃅꏦꀧꌠꇲꁵ。ꏓꂱꂽꏃꂠꏲꂠꏦꉻꉺꏦꄻꐛꒆ,ꃹꅼꃅꐮꐊꌉꈿꉻꑫꄺꀱ,ꃹꅼꃅꂽꃅꄷꐂꄉꄺꀱ。
ꐊꈴꃀꊡꀱꇬ,ꄈꅿꏲꂠꌠꆹꀒꁨꋍꁘꃅꐊꑷꃅꃹꅼꃅꄺꀱ、ꍏꇩꃤꐛꏀꈴꌠꄹꎆꌠꁧꀦꄉꀧꅍꉬ。ꀋꎪꃅꃹꅼꃅ“ꑍꑵꏤꄻ”ꄉꌠꏤꇽꐨꈻꇐꌧꐚ,“ꇖꑵꉪꉻ”ꑌꈬ、“ꇖꑵꑴꑇ”ꌠꌭꈬ、“ꑍꑵꀧꌋꃅ”ꌠꃅꇫꑟ,ꄈꅿꑴꅉꇝꂱꌠꌌꐧꋦꇝꂱꄐꏁꌠꀊꂥꃅꑴꐚꌠꄝꀋꊰ,ꄺꀱꉌꊈꌋꆀꏦꇨꌠꎕꏦꌌꄈꏲꄈꄻꌠꌭꈬ,ꄈꅿꑴꅉꇝꂱꄹꏦꋊꍬꉻꑫꄻꐛꒆ,ꀋꆏꃅꄈꑴꅉꌃꎴ、ꑴꅉꄻꐛꒆ、ꑴꅉꏀꄻ、ꑴꅉꉀꐕꌠꄹꎆ,ꄈꆹꈍꄮꑌꍏꇩꐛꐨꐧꋦꉪꏦꌤꑘꇬꏲꂠꈯꄜꀉꇨꌠꐛꌠꄉꀧꌶ。ꄈꍏꑷꀒꁨꋍꁘꃅꐊꑷꃅꃹꅼꃅꄺꀱꌠꏭꏓꋧꋍꃱꃅꏲꂠꌠꌭꈬ,ꃹꅼꃅꄈꋈꄻꄹꏦꄺꀱ,ꃹꅼꃅꄈꃅꇏꐙꎴꌠꋈꄻꌠꌋꆀꍹꈔꏭꁏꌠꄹꎆ,ꎸꇺꋯꌠꉌꊈꌌꄉꄺꀱꌠꃅꇫꑟꌠꒃꉇꋒ。
ꐊꈴꃀꊡꀱꇬ,ꍏꇩꃤꐛꏀꈴꌠꆹꄮꐽꃅꀻꎆꌠꈝꃀꍬꌠꐛꏀꈴꌠꉬ。ꀋꎪꃅꏟꈯꃅꄂꋦꑴꌅꌠꄮꐽꃅꉇꉻꑌꑲꌠꏱꁈꃄꌬꌶ,ꃰꊿꊫꂫꐮꐊꄜꏓꄻꌠꄹꇙ,ꋧꃅꃰꊿꏓꐊꁌꐨꃄꄻ,ꅉꆺꑭꊂꀻꎆꄕꊪ、ꅉꆺꑭꊂꋬꂻꄕꊪ、ꅉꆺꑭꊂꌧꑳꄕꊪꌠꃅꇫꑟ,ꐥꊯꊱꁨꌠꋧꃅꀉꑌꑵꃅꐙ、ꈲꈴꅓꏆꌠꎆꏣꅉꆺꈴꌠꄕꊪ,ꃹꅼꃅꉇꉻꑌꑲꌤꃅꉺꏦꄺꀱ,ꅉꆺꑭꊂꏱꄻꉻꑫꄺꀱꌠꌋꆀꋈꄻꌠꄐꏁꈽ,ꏟꈯꃅꇩꏤꌅꀨ、ꋬꂻ、ꀻꎆꈲꁧꀧꌋꃅ。
ꐊꈴꃀꄐꌐꎼꇁꇬ,ꐊꈴꃀꉌꊈꌶꄻꋒꃄꌬꋒꌠꆹꀋꃅꋋꇅꇬꌋꆀꋌꊂꋍꊭꇬꄈꑭꊂꇩꏤꑭꊂꇬꍔꍞꂿꃆꀉꒉꀊꂾꐘꉬ。ꃹꅼꃅꐊꈴꃀꈿꉌꊈꌧꐚ,ꃹꅼꃅꀒꁨꋍꁘꃅꐊꑷꃅꃹꅼꃅꄺꀱꌠꀨꄜ、ꏥꏦꀉꒉꀊꂾꌠ、ꏁꁈꀉꒉꀊꂾꌠ、ꁧꀦꄉꀧꌠꌧꐚꌋꆀꒃꌫꌶ。ꄈꑭꊂꐰꉎꃅꉌꏓꊋꋧꄉ《ꏤꐪ》ꃄꌬꇫꑟꌠꒃꉇꋒ,ꀒꁨꋍꁘꃅꐊꑷꃅꃹꅼꃅꄺꀱꌠꄐꇐꄐꁆꌠꆹꏮꌊꍏꇩꃤꐛꏀꈴꌠꄹꎆꌠꊋꃤꀉꇨꌠꐛꎻ。
ꐊꈴꃀꆹꀋꃅꋋꇅꇬꃅꒊꃅꇁꌋꆀꂿꃆꌌꎥꃪꀐ,ꀋꇙꀋꑐꃅꋋꈓꇬꎆꏣꐧꋦꀻꎆꁻꌐꃅꇫꑟꄷꊡꀱ。ꄈꍏꑷꎆꏣꌤꃅꃆꂮꁈꏤꄐꁆꌠꇬꈴꄉ,ꉻꒉꏱꁈꃅꇫꑟꋒ,ꏣꀋꑌꃅꇩꈐꈉꐨꍔꐯ,ꑞꃅꋭꌠꑞꃅꃅꊈꏀꒃꅐꊋꃤꀻꎆ,ꐳꃅꉇꉻꃼꇇꇙꊋꀊꏀꌠꉘꉚ,ꏟꈯꃅꀊꃴꌋꀁꂥꀻꎆꌠꄹꎆ,ꃶꐚꃅꉹꁌꐥꐨꏦꀧꌋꆀꄻꃪ,ꎭꇔꈢꇓꀖꊌꐨꍔꀺꌠꄻꈫꈈ。“ꊯꇖꉬ”ꄐꎖꃅꇫꑟꐨꄤꎖꏓꇱ,ꃶꐚꃅ“ꊯꉬꉬ”ꄐꎖꂴꊬꌠꎖꄎꌠꌤꃅꋒ。
ꐊꈴꃀꄐꌐꎼꇁꇬ,ꀻꎆꌋꆀꋬꂻꌠꏓꇲꋒ,ꑲꅉꇤꂷꅐꑘ、ꃅꄷꍔꃚꎝꃆ、ꐧꐭꎆꒉꎆꇁꏲꉻꑠꀋꉬꀋꉆꁁꏯꃨꆰꐨꄴꏮꋊꑣꌠꋍꑞꋍꐘꃄꁈꃄꌬꇫꑟ,ꏦꇨꃅꋬꂻꒃꅐꆽꎍꐨꃅꇫꑟ,ꋌꐛꉮꌸꈜꀕꇈꒈꅐꃪꂪꉮꌸꌠꍞꏲ、ꄴꋏꏁꁈꄻꐛꒆ,ꐧꋦꋬꂻꃨꆰꐨꄴꋏꈄꃮꎀꌤꃅꄉ,ꃶꐚꃅꐧꋦꎍꐽꌠꀧꌋꃅ。ꊋꀥꇱꄉꉉꈻꈋꍣꌠꄐꏁ,ꇿꋌꐥꃅꉪꐪꐛꉻꃨꆰꐨꄴꏮꋊꑣ。ꇿꋌꐥꃅꉇꉻꏭꃨꆰꐨꋓꎭꇁꌠꏭꊝ,ꅉꆺꑭꊂꃅꏱꄻꌠꄐꏁ,ꑴꇙꃅꉇꉻꋦꈭꏭꈲꏣꐥꌠꎵꄻ。
ꐊꈴꃀꊡꀱꇬ,ꏓꇱꄉꐊꈴꃀꉌꊈꌶꄻꄜꉺꃄꌬꈴ,ꄈꅿꏀꀺꌧꇗꌷꉌꂵꊐꌠꒃꉇꋒ,ꄈꑭꊂꂷꇻꌦꉪꏦꌧꐨꌋꆀꐛꏀꈴꋈꄻꄐꊋꉀꐕ。ꐊꑷꃅꏦꇨꃅꄈꏲꉻꑫꄻꐛꒆ,ꃶꐚꃅꃅꇏꄻꃪ,ꇶꏦꉪꏦ、ꇛꌺꉪꏦꀉꁘꌠꆼꑣꇧꎭ,ꐪꊛꄉꅉꂫꊐꌠꀵꃤꊨꒊ,ꃹꅼꃅꄈꃅꇏꐙꎴꋈꄻꌠꌋꆀꍹꈔꏭꁏꉈꈽꌠꄹꎆ,ꏟꈯꃅꏮꄉꍤꌠꌤꃅꋒ。ꄜꀨꉙꂘꊌꐨꍔꀺꌠꄻꈫꈈ,ꃹꅼꃅꄈꍬꏦꌶꄻꉙꂘ,ꄈꅿꋯꑌꋍꃱꃅꌠꀧꌋꃅ,ꀋꆏꃅꄈꅿꀹꄻꊋꃤ、ꏓꋧꊋꃤ、ꉈꈽꊋꃤꄻꀉꇨ。
ꐊꈴꃀꆹꄈꏦꏤꐪꇬꈴꄉ,ꍏꑷꊈꑼꉼꊁꇱꊈꑼꄂꑤꐋ、ꒄꆀꏮ、ꒄꏣꉼꊛꇱꌊꍏꑷꊈꑼꉼꊈꑼꃅꄉꌠꐰꏤ。
ꐊꈴꃀꐰꏤꇬ,ꐋꀨꏿꇤꄉꅍꇔꇖꂟꌠꉌꃹ,ꐋꀨꏿꇤꍏꑷꊈꑼꉼꊈꑼꄉꅍꇔꇧꎭ。
ꐊꈴꃀꆹꍏꇭꍏꑷꂽꌤꊈꑼꉼꅿꎮꃛ、ꅿꒄꍧ、ꌜꏢꂱꀉꆈꃅꍬꏦꐆꏦꃤꐆꌠꌤꃆꃆꂮꍤꄻꅇꄜꌠꌌꍤꇖꇈꉌꃹꈴꀐ,ꍏꑷꍔꍞꏳꂴꏭꏤꄻꄉꌠꅿꎮꃛ、ꅿꒄꍧ、ꌜꏢꂱꄈꐴꇇꉈꋊꇧꎭꃅꅓꀞꌠꏚꍆꀐ。
ꐊꈴꃀꇳꍝꇬ,ꄈꑭꊂꂽꑭꊂꇩꏤꑭꊂꊿꋅꈁꐥꌠꏓꂱꆏꀊꅰꃅꑖꑟꃅꋯꑌꌊꐋꀨꑮꏣꀻꈯꄜꃅꄉꌠꄈꍏꑷꈭꇍꄉ,ꄺꀱꁉꃑꁈꁧꀊꂥꃅꐕꄉ,ꉌꋧꊋꏓ、ꊋꇤꄉꀒꁨꆹ,ꐊꑷꃅꐧꋦꉪꏦꐛꏀꈴꇩꏤꀉꇨꌠꄻꐛ、ꉐꈎꉈꈽꁻꌐꑍꂷꂶꌠꃅꇫꑟ,ꍏꇩꃤꐛꏀꈴꌠꌌꐊꑷꃅꍏꉸꊿꋅꇰꀋ꒜ꃅꀱꌄꆣꇁꌠꄹꎆꌠꎁꃅꊋꇤꄉꉈꈽ!
-
【高质量发展调研行】从篮球热到稻花香,来看“村BA”后花园的丰收故事
水车不断转动,蝉鸣伴随着浓郁的稻香宣告着秋天谷物的丰收。台江县台盘乡阳芳村,因紧邻“村BA”发源地台盘村,其依山傍水、景色宜人的环境特点,被誉为“村BA”的后花园。